قصص نجاح ❤️

طلاب توجيهي

حاب احكيلكم قصة بما انه بكرا النتائج 

وكلكم صاحيين ،ياريت تكملو قرائة لنهاية

انا حاليا بدرس علم حاسوب بالاردنية سنة ٣

انا بني ادم قبل توجيهي عمري ما رسبت بمادة وكان معدلي دائما بين ٨٠ و ٩٠ وصدقا مش محبة بدراسة بس الوالد الله يخليلكم اهلكم كان مجهز القشاط في كل ليلة بتنزل فيها الشهادات فكنت من رهبة ادرس واجيب معدل 😂 ما قبل توجيهي وصلت اول ثنوي ابوي قال اوك هسا هو راشد هو بقرر بده يدرس ولا لعمره لا درس عمل الي عليه المهم بالاول ثنوي انا يعني احترمت انه ابوي اعطاني الحرية الكاملة وما حبيت اخيب ظنه فرحت سجلت بمركز فيزيا بالاول ثنوي بس اول ثنوي بنعرف يعني ما فتحت كتاب قضيتها العب سلة طول سنة، اجا التوجيهي وكنت علمي وفعلا كنت ناوي ادرس اعطيت تلفوني لابوي من اول السنة يضبه وكنت ادخل الغرفة اسكر على حالي بالساعات ما اطلع كنت انسخ وادرس وانسخ واحل مواعين ورق ودفاتر كنت اكب كل اسبوع من كثر الورق يعني اكثر فصل درست فيه بحياتي بس دراسة الي درستها كنت الاقي حالي ضعيف بكثير شغلات بسبب اهمالي بسنين الماضية وكنت ضعيف جدا برياضيات واحتجت خصوصي ودفعت والدي الي فوقه والي تحته عخصوصي رياضيات ودرستت 

المهم اجت امتحانات الوزارة واولها كان رياضيات وكان امتحان لطيف كثير وجبت كل الاعياد فيه طلعت حكيت لاهلي اني مشيت حالي فيه عشان اقدر اكمل بقية الامتحانات بنفسية كويسة ما حكيت اني خبصت بس ضليت متدايق كثير داخليا علي صار بعد دراسة الي درستها 

ونفسيتي أثرت على ادائي في بقية امتحانات الفصل الأول وطلعت نتائج وهون انا انصدمت صدمة عاطفية كبيرة 

رسبت بالفصل الاول بالرياضيات وكنت جايب ٤٨ من ١٥٠ وجبت معدل ٦٦.٧ وبتعرفو كيف الشخص بصير يشوف الناس الي نجحت وبعاتب حاله ومقهور انه انا درست ليش صار هيك

أجا الفصل التاني عرفت نقاط ضعفي وعرفت اني الفصل الاول كله كان عبارة عن تاسيس بنسبة الي لاني كنت مهمل جدا سابقا وسبب تدهور المعدل الرئيسي كان رياضيات وسجلت كيمياء كمان مرة رفع معدل صار فصل مليان مواد نفسه

فصل الفيزياء سجلت في مركز وحاولت الملم حالي وبرضو جبت خصوصي رياضيات ومش بس درست مصدر لرياضيات وخلص لا حليت دوسية استاذي والكتاب 

وانتهى الفصل الثاني وكنت دارس دراسة الله بعلم فيها 

طلعت نتائج طلعت راسب برياضيات بالمجموع على علامتين 

بس علامتين اخروني فصل كامل بس بالمقابل معدلي صار من ٦٦ وصل ل ٧٢ 🔥 رفعت في فصل ٦ علامات 

فقلت بدل ما اعيد بس رياضيات بعيد معه احياء وفيزياء رفع معدل

اهلي ما قبلو اعيد غير رياضيات رحت بدون علمهم سجلت أحياء ورياضيات وتركت الفيزيا مع انه كان نفسي اعيدها كان نفسي ادرس هندسة حاسوب لانها من طفولتي طموحي 

بس عدت فصل ٣ رفعت معدلي من ٧٢ ل ٧٨.٥ وصراحة كانت اعظم فرحة بحياتي كلها تضايقت ليش ما وصلت ٨٠ وكنت افكر اسجل فيزيا وانا بالجامعة بس بعد التشاورات قررت ادرس computer Science وصراحة كان احسن قرار قررته بحياتي لاني الحمدلله ابدعت بتخصصي وعوضت الفصل الي راح علي بقطع عدد كبير من ساعات كل فصل وحبيته جدا وتقديري جيد جدا وصار عندي certifications في مختلف لغات البرمجة من كورسات جامعات عالمية عالنت بتقدرو تشوفوها عالهايلايت في بروفايلي و لانه خلال مسيرتي بالجامعة اكتشفت انه تخصص شامل للمجال وما في شغلات اضافية بعيدة عن المجال زي الي باخدوها الهندسة واقتنعت انه الحمدلله ما طلعلي هندسة فالي بدي اوصلكم يا شو ما يطلع بكرا نتيجتك 

هاي نتيجة ما بتمثلك وليست مقياس لو كانت كويسة انبسط ولو ما عجبتك اسعى انك تحسنها وتوصل لطموحك الزعل ما رح يفيدك باشي 🙋🏻‍♂️❤